SI KANHI Toledo City mayor ug senator John Henry Osmeña, 84, naulian na gikan sa coronavirus disease (Covid-19) human sa pagpuyo og 20 ka adlaw sa usa ka pribadong ospital sa Dakbayan sa Sugbo.

Sukwahi kini sa mga hungihong nga gipasa-pasa sa social media niadtong Hunyo nga si Osmeña namatay sa Covid-19.

Sa iyang Facebook post, si Toledo City Community Affairs and Development Officer Ferliza Contratista sa Hulyo 8, 2020, kini nagpakita kang Osmeña nga gi-discharge na gikan sa ospital.

“Senator John Henry Osmeña is now released from his 20 day hospitalization for Covid 19. Cheers and claps by hospital staff as he was sent home,” suwat ni Contratista.

Si Contratista nisuwat usab sa comment section sa iyang post nga si Osmeña wa magsul-ob og shirt nga makita sa hulagway kay ang iyang mga samad, tungod sa bedsores, padung pa maalim.

Matod sa usa ka kasaligang tinubdan nga si Osmeña gi-admit niadtong Hunyo 19 sa pribadong tambalanan human nipakita og mga simtomas sa Covid.

Gikompirmar sa tinubdan nga si Osmeña nigawas sa ospital sa Miyerkules, Hulyo 8, 2020.

Sa Hunyo 29, dunay mga hungihong nga si Osmeña namatay apan gibaraw kini ni Contratista kay ang senador nakigkombate pa sa sakit niadtong higayuna.

Si Osmeña nihatag pag instructions ngadto sa pipila sa iyang staff gikan sa iyang katre sa ospital, matod niya. (JJL, dugang taho ni REV)