GIKOMPIRMAR sa pangulo sa Lapu-Lapu City Social Welfare and Development Office CSWDO, Annabeth Cuizon, nga nakarekober na ang 31 ka mga bata ug 15 ka mga staff ug personnel sa Homecare Center sa Brgy. Gun-ob gikan sa coronavirus disease (Covid-19).

Kini human nga ang tanan nakahuman na sa ilang 14 ka adlaw nga pag-quarantine.

Gibutyag ni Cuizon nga mild nga simtomas ra ang nasinati sa tanang nagpositibo sa Homecare Center sama sa pag ubo-ubo.

Apan isip precautionary measures sa nagpadayong pagsaka sa mga kaso sa Covid-19 sa dakbayan, dili lang una manawat og bisita ang pasilidad.

Kon ugaling adunay ganahan mopadangat sa ilang hinabang sa mga bata sa pasilidad, anaa ray lamesa sa gate diin mahimong makabilin sa ilang hinabang.

Aron usab kalikayan nga dili malutsan og laing kaso sa Covid-19, ang pasilidad maningil na usab og negatibong resulta sa reverse transcription-polymerase chain reaction (RT-PCR) test sa mga batang i-endorso sa kapulisan sa pasilidad.

Unang adunay nagpositibo sa pasilidad niadtong Agosto 3 nga maoy nakapaaghat sa kagamhanan nga ipaubos sa lockdown ang pasilidad samtang gipahigayon usab ang halapad nga contact tracing.

Sa miaging semana, una nang nakarekober ang 26 ka mga bata ug duha ka mga personnel sa pasilidad.

“Katong nahabilin nga gipang ubo pa last week, mao ato gi-extend ila quarantine. Naayo naman so naka recovered na gyud sila tanan karon,” matod ni Cuizon. (GCM)