ANG estriktong pagpatuman sa balaod sulod sa Operation Second Chance (OSC) ang gidudahang maoy nakapasuko sa mga Children In Conflict with Law (CICL) hinungdan sa ilang pag-eskapo.

Si Ambrocio Ibones, pangulo sa OSC, nagkanayon nga sa iyang pag-asumir sa katungdanan pipila na ka buwan ang nalalabay, iyang hingpit nga gibatokan ang pagpasulod sa mga ginadili.

Kini sama sa paggamit og cellular phone sa mga CICL, pagpamaligya ug pagyupyop og sigarilyo ug pagpasulod sa mga uyab sa CICL.

Iyang gihulagway nga luag ang implementasyon sa miaging administrasyon.

Gani iyang gisaysay nga tag P200 ang stick sa sigarilyo sulod sa OSC. Giilisan ang kanhi mga kawani gumikan kay wa sila makapatuman sa balaod sulod sa OSC.

Nilusad na usab og pasiunang imbestigasyon si Ibones aron masayran kon si kinsa sa mga house parent o sa ilang kauban ang nagdagmal kanila apan ang mga CICL nga nabalik na sa ilang kustodiya wala nitug-an.

Si Mayor Edgardo Labella mopa-imbestigar usab sa maong alegasyon sanglit dili siya makatugot nga kini mahitabo sa mga minor.

“I will look into that kay naa man kahay maltreatment. We have more reason to look into that and let the heavens fall, maybe they are responsible. Dili mahimo na, that’s child abuse,” padayag ni Labella kinsa makighinabi sa mga menor nga maoy nialegar.

Sa kasamtangan, aduna pay lima ka CICL nga wa pa mabalik sa ilang kustodiya.

Apan ang OSC aduna nay gihimong koordinasyon sa ilang mga pamilya para mabalik ang ilang mga anak.

Ang OSC adunay 79 ka CICL diin ang 11 hingpit nga nakaeskapo gikan sa ilang kustodiya niadtong Biyernes sa gabii apan ang unom nibalik ug nitahanr paglabay sa usa ka adlaw.

Si Labella, sa iyang bahin, niawhag sa mga ginikanan sa pagtahan sa ilang mga anak aron di usab sila manubag sa balaod pinaagi sa pagtago sa ilang mga anak nga adunay nalapas nga balaod. (PAC)