CATBALOGAN CITY, SAMAR - Kandidato pagka mayor sa Matuguinao, Samar ang gipusil sa wa mailhing responsable.

Giila ang biktima nga si Aran Boller, 42, taga Barangay Mabuligon, Matuguinao Samar.

Ang insidente nahitabo sa Japzon Codina Dental Clinic sa Catbalogan City Samar pasado alas 6 sa gabii niadtong petsa 18.

Base sa imbestigasyon, diha sud sa iyang sakyanan nga Toyota Avanza (YJE 932) ang biktima.

Kalit niabot ang tulo ka responsable og gipamusil si Boller.

Nakaangkon og usa ka samad pinusilan sa iyang tuo nga kamot si Boller kinsa dali gidala sa tambalanan alang sa pagpatambal.

Human sa insidente, dali nga nanglakaw ang mga responsable.

Pipila na ka pulitiko ang biktima sa pagpamusil sa Samar area sud ning tuiga.

Niadtong Agusto, gipusil patay si Mercedes, Eastern Samar Municipal Councilor Antonio Abris sud sa usa ka basketball court.

Sa miaging buwan, gipusil si kanhi San Jose de Buan, Samar mayor Ananias Rebato sa mga nagpailang NPA diin patay sa pinusilay ang bodyguard niini nga si Severino Tesoro.

Pipila ka adlaw ang nakalabay, namatay usab ang kanhi mayor samtang naka-confine sa tambalanan. JKDP