KANHI call center agent nakuhaan og P1.2 million nga balor sa gituohang shabu atol sa buy-bust sa Mandaue City Police Office (MCPO) sa M.L. Quezon st., Barangay Casuntingan, Mandaue City, ala 1:30 sa kaadlawon sa Marso 14, 2020.

Ang suspek giilang si Judie Aniban Villanueva, 22, taga Barangay Lawaan, Talisay City, giilang high value individual (HVI) sa city level.

Si Police Lt. Col. Franco Rudolf Oriol, pangu sa City Drug Enforcement Unit (CDEU) sa MCPO, niingon nga si Villanueva kanhi call center agent.

Si Oriol niingon nga ang contact ug supplies ni Villanueva gikan sa Talisay City nga ilang ipailawom sa follow up operations.

Si Villanueva giingong makabaligya og 500 grams ngadto sa usa ka kilo sa shabu matag semana.

Ang dapit sa iyang operasyon naglakip sa mga Siyudad sa Sugbo ug Mandaue.

Nasakmit gikan kang Villanueva ang 180 gramos sa gidudahang shabu nga dunay Dangerous Drugs Board (DDB) value nga P1,224,000.

PDEA 7

Duha ka mga residente sa Barangay Labangon, Siyudad sa Sugbo nadakpan sayo sa Biyernes sa gabii sa usa ka buy-bust operation sa Philippine Drug Enforcement Agency (PDEA)-7.

Si IA 1 Jessie Cabutotan maoy nangu sa buy-bust diin nasikop sila si Jhon Michael Arquillano, 26, ug Roseller Abella, pulos mga lumolupyo sa Bliss, Barangay Labangon ning siyudad.

Matud ni Cabutotan nga si Arquillano ang ilang target samtang si Abella kaabag sa ilegal nga negosyo ni Arquillano.

Nakuha gikan kanila ang 50 gramos sa gituohang shabu nga balor og P340,000 base sa DDB value.

Si Abella maoy suguon ni Arquillano sa mga transaksiyon sa Barangay Labangon ug silingan nga barangay.

Si Arquillano niangkon nga tigbaligya, apan ginagmay lang.

Mga suspek pasakaan og mga kasong pagpamaligya og ginadiling drugas. / KFD, BBT