KANHI konsehal sa lungsod napusasan human nasakpan nga nanglili ug nagkuha og video sa 24 anyos nga babaye nga naligo.

Ang insedente nahitabo sa alas 6:00 sa gabii niadtong Sabado, Mayo 8, 2021 sa Barangay Looc, Lungsod sa Dumanjug, Cebu.

Si kanhi municipal councilor Ely Amadora, 42, ulitawo ug molupyo sa dapit, napusasan human ni-report ang babaye sa kapulisan.

Si Police Master Sgt. Ian Joseph Arapoc sa Dumanjug Police Station nga nahinabi sa Superbalita Cebu nagkanayon ang nag-shower ang babaye niadtong higayona.

Apan guba ang kisame sa banyo ug samtang nanglugod siya sa iyang lawas, nakit-an niya ang selpon nga didto sa ibabaw nga nasentro kaniya.

Nagdali siyag gawas ug naabtan niya ang kanhi konsehal nga nag-review sa iyang selpon sa pagtan-aw sa video.

“Giduol sa biktima gisukmatan nganong givideohan, ana daw si konsehal nga ako na gi-erase,” dugang ni Police Master Sgt. Arapoc.

Ang babaye nangayo og abag sa mayor sa lungsod ug gi-report sa kapulisan.

Si Amadora dihang ilang nahinabi nipadayag nga natintal siya.

Si Amadora nipadayag nga una niyang hiyaon kadtong gibuhat.

Matod ni Arapoc, ang selpon ipahiling nila sa cyber crime unit aron makita didto ang ubang mga recently deleted nga picture o video. Ang babaye nagtrabaho sa munisipyo sa lungsod ug usa sa mga boarder ni Amadora. (GPL)