Nasikop sa Criminal Investigation and Detection Group (CIDG) 7 kagahapon, Hulyo 23, ang kanhi sakop sa New People’s Army (NPA) nga naglihok kaniadto sa Agusan del Norte human malutsi og warrant of arrest.

Ang nadakpan mao si Jan-jan Biory alyas Fortunato, 39, kasamtangan nga nagpuyo sa Barangay Timpolok, siyudad sa Lapu-Lapu nga nalakip sa most wanted person top 7 communist terrorist group priority target sa PNP didto sa Agusan del Norte nunot sa giatubang niining kasong kidnapping.

Human siya gikiha sa dakbayan sa Butuan, nisibat na kini ug sa Lapu-Lapu nagtagotago sa dugay nga panahon. Walay gitugot nga pyansa ang korte ug gitakdang dalhon si Biory sa Agusan sa mosunod nga mga adlaw. (AYB)