Kanhi overseas foreign worker (OFW) samdan sa liog human gidunggab sa wala pa mailhing tawo sa Lunes sa gabii, Enero 10, 2022, sa Brgy. Poblacion, lungsud sa Ronda, Sugbo.

Si Rodel Villafuerte, 46, ulitawo, nagpuyo sa nahisgutang lugar, samdan sa tuong bahin sa liog human dunggaba sa usa ka tawo nga daling nisibat.

Si Police Master Sgt. Joselito de Aguino sa Ronda Police Station nga nahinabi sa Superbalita Cebu nagkanayon nga si Villafuerfte nagtagay uban sa iyang mga higala.

Human sa inom, nag-inusara siyang nipauli mga alas 11:15 sa gabii kay insakto na ang iyang nainom.

Apan sa dayon niyang sulod sa ilang balay, usa ka wala ma-ilhing tawo ang giingong nikalit pagtumaw gikan sa ngitngit ug nidunggab kaniya sa liog gamit ang wa pa matino nga hait nga butang.

Hinuon luwas na ang kahimtang sa biktima nga naa sa tambalanan.

Personal grudge ang gisubay sa kapulisan nga motibo sa kremin.

GIATANGAN

Samtang nakalingkawas sa tinong kamatayon ang usa ka mag-uuma nga giatangan sa iyang silingan ala 1:30 sa hapon sa Lunes sa Brgy. Obong, lungsod sa Dalaguete habagatang Sugbo.

Si Rodrigo Bonao, 45, mag-uuma, nakaangkon lang og mga pangos dihang niambak sa pangpang aron likayan si Roberto Umaya, 21, ulitawo, mag-uuma.

Nasikop sa follow up sa kapulisan si Amaya.

Si Amaya nigamit sa improvised shotgun kun suritsurit sa pag-ambush kang Bonao.

Si Bonao nibutyag sa kapulisan nga sakay siya sa iyang motorsiklo padulong mopauli.

Pag-abot niya sa awaaw nga dapit, gipusil siya ni Amaya, apan ang iyang motorsiklo ray naigo.