KAPIN sa 400 ka mga binilanggo sa Cebu City jail ang naka-recover gikan sa coronavirus disease (Covid-19) ug wa nay bag-ong mga kaso nga gitaho sa kapin na sa usa ka buwan.

Sa usa ka Facebook post sa Cebu City Public Information Office (PIO), kinatibuk-ang 427 ka mga piniriso, nga nataptan sa sakit, nangaayo na.

Si Cebu City Jail Warden Superintendent Julius Arro niingon nga ang ilang dinaliang intervention nakatabang sa pagkontrolar nga di makakuyanap ang kagaw.

Ang unang kaso gikan sa Cebu City Jail natala sa Abril 19, 2020 ug sud sa duha ka mga semana, ang infected nga mga piniriso sa pasilidad niabot og 300, matod sa PIO.

Ang labing uwahi nga nataptan sa Covid-19 niadto pang Hunyo 12.

Apan sa data nga gihatag sa SunStar Cebu sa Bureau of Jail Management and Penology (BJMP) 7, moabot lang og 352 ka mga piniriso ang nataptan, diin tulo ang nangamatay.

Ang unang kaso sa jail natala niadtong Abril 19, 2020 ug namatay sa samang adlaw.

Bisan sa pagsuspenso sa mga bisita nga gipatuman niadtong Marso sa Bureau of Jail Management and Penology (BJMP), ang infection sud sa pasilidad niabot gihapon.

Sa unang mga taho, si Cebu City Health Department (CHD) head Daisy Villa nagtuo nga usa ka jail officer hayan maoy “Patient Zero” nga nidala sa Covid-19 sa City Jail.

Ang mao nga jail guard nagpuyo sa Barangay Labangon diin dunay mga infection sa Covid-19, matod ni Villa.

Ang tanang nataptan nga mga binilanggo gipangbalhin sa bag-ong building nga nagsilbeng isolation facility.

Ang insidente nakapaaghat usab kang Cebu City Mayor Edgardo Labella sa pag-require sa tanang persons deprived of liberty (PDL) kun piniriso sa pagpailawom sa swab test sa di pa sila dad-on sa pasilidad nunot sa Executive Order 71 nga gluwatan niadtong Abril 27.

Ang Cebu City Jail dunay 6,582 ka mga inmate.

Gidesinyo kini alang lang unta sa 1,500 ka mga binilanggo. (JJL uban sa PR)