MOABOT sa 8% ang bahin sa Kapitolyo kon magsugod na og kita ang Alegria oilfield nga bag-o lang usab gisubhan.

Si Gob. Hilario Davide III kompiyansa nga magmalampuson ang proyekto ug nanghinaot siya nga maka-comply kini sa tanang rekisitos, ilabi na sa mga lagda sa kinaiyahan.

Mismo si Presidente Rodrigo Duterte maoy nangulo sa ceremonial valve opening sa Alegria Oilfield Polyard-3 Well Site ug iyang gihulagway nga dato ang lungsod tungod sa nadiskubrehan nga oil ug gas nga dunay commercial value.

Kon hingpit nang magsugod ang operasyon ug mokita na kini, hayan nga magdawatan ang Kapitolyo ug 8% sa gibana-banang P82 milyones nga binuwang kita sa oilfield.

Positibo usab si Davide nga maghatag ug kalambuan sa ekonomiya dili lamang sa Alegeria kundi lakip na sa mga silingang lungsod kon magmalampuson ang proyekto.

Sa pagkakaron, wala pay konkretong plano ang Kapitolyo kon unsaon ang pondo nga posibleng makuha nila gikan sa Alegria oilfield apan sigun sa gobernador, siguro nga mapunta kini sa mga proyekto sa kagamhanan.

Gawas sa Kapitolyo, makadawat ug bahin sa kita ang barangay nga moabot sa 14% ug ang lungsod nga moabot ngadto sa 18%.

Una nang nag-courtesy call sa Kapitolyo ang mga tinugyanan sa China International Mining Petroleum (CIMP), nga maoy nagpasiugda sa proyekto.

Matod sa gobernador, gipasaligan siya sa kompaniya nga motamod gyud sa tanang rekisito, ilabi na mahitungod sa kinaiyahan, pagsiguro nga nahisubay kini sa mga lagda.

"They assured me that they are complying with the requirements sa DENR ug DOE,” matod ni Davide. (AZDL)