Moabot sa 700 ka mga packs sa bugas, canned goods ug uban pang mga hinabang gidunol sa Kapitolyo sa mga biktima sa sunog sa Sitio Paradise, Barangay Looc, Dakbayan sa Mandaue.

Gipahibaw sa Kagamhanan sa Lalawigan nga pinaagi sa Provincial Social Welfare and Development Office (PSWDO) nga pasiunang nakadunol na og hinabang nga dunay tag lima ka kilong bugas, canned goods, tubig mainom ug plastic water gallons nga dunay gripo.

Gidugang usab niini ang hygiene kits nga may mga bath towel, laundry soap, sanitary napkins, toothbrushes, toothpaste, shampoo ug health kits sama sa alcohol, face masks, ug ascorbic acid.

Niadtong Nobiyembre 23, miigo ang sunog sa naasoyng lugar nga niresulta sa pagkaugdaw sa balay sa 670 ka mga pamilya.

Sa kasamtangan anaa sila namasilong sa gym sa barangay ug sa Cesar Cabahug Elementary School sa Looc.

Subay sa uwahing kalambuan, tukuron sa Kagamhanan sa Siyudad ang 14,000 ka units nga housing project sa Sitio Maharlika, Barangay Tipolo subay sa pakigsabot sa Department of Human Settlements and Urban Development (DSHUD).