Sugod sa Abril 1, 2022 giisa na sa kapulisan sa dakbayan sa Sugbo ang full alert status nunot sa hugot nga pagpatuman sa siguridad alang sa Semana Santa lahos na sa eleksiyon sa Mayo 9, 2022.

Matod ni Police Lieutenant Colonel Wilbert Parilla, deputy director for operations sa Cebu City Police Office (CCPO), nga nagpasabot kini nga wa nay police personnel nga gitugotan nga maka leave sa trabaho, lakip na ang passes, ug gipang recall na usab ang nakabakasyon na.

Matag karon ug unya adunay ipatawag nga accounting sa mga personnel sanglit abnormal na ang ilang duty kay mamahimong ipakatap sila sa bisan asang dapit sa dakbayan.

“Abnormal na ni ang atong duties. From time to time pwede kang ma-deploy. So, mao nang full alert ta. Dili sila pwede nga molayo sa Cebu City kay anytime mopatawag tag personnel for deployment,” matod ni Parilla.

Aduna nay gihimong sunodsunod nga mga meeting ang kapulisan uban sa Cebu Archdiocese diin nasuta nga balik na sa normal ang mga kalihukan sa simbahang Katoliko panahon sa Semana Santa nga wala pa ang pandemya.

Gibutyag ni Parilla nga ang Stations of the Cross sa Celestial Garden sa Banawa, Guadalupe, lakip na ang mga prosesyon, gitugotan na kay naa na sa Alert Level 1 ang dakbayan sa Sugbo.

Abli ang mga simbahan sa siyudad sa Sugbo sa tibuok Semana Santa nga magsugod sa Abril 10-17, 2022.