Gihulagway sa kapulisan sa dakbayan sa Sugbo ug Commission on Elections (Comelec) nga malinawon, hapsay ug luwas ang piniliay sa Lunes Mayo 9, 2022.

Samtang, ang Cebu City Police Office (CCPO) nagkanayon nga magpadayon na usab sa ilang naandan nga anti-criminality campaign.

Nipakatap ang CCPO og dul-an 1,000 ka mga pulis sa polling precincts aron lang nga mabantayan ang mga botante sa ilang pagbotar.

Si Police Lieutenant Colonel Maria Theresa Macatangay, tigpamaba sa CCPO, niingon nga human sa pagpatuman sa seguridad sa eleksiyon, motutok na usab sila sa ilang kampanya sa gubat batok sa illegal nga drugas ug uban pa.

Samtang nag-monitor na usab sila sa laing panagtapok sa mga militanteng pundok ug supporters ni Vice President Leni Robredo nga giingong adunay himuon nga kalihukan ning semanaha aron matod pa moduyog sa pag kondinar sa giingong “lapad nga tikas” sa eleksiyon.

Nakadawat na usab og laing kasayuran ang kapulisan nga molusad og panag tapok ang mga militanteng pundok.

Gumikan niini, andam ra sila nga mo deploy og mga personnel sa dapit kon asa molusad og mga programa ang mga tawo.

Hatagan og kahigayonan sa kapulisan nga molusad sa ilang panagtapok ang mga militante lakip na ang mga supporter sa usa ka kandidato gumikan kay ila man usab kini nga katungod, sigun ni Macatangay.