DUL-AN sa 50 ka mga police personnel sa Mandaue City Police Office (MCPO) ang random nga napili nga gipaubos sa HIV test, Huybes sa buntag, Disyembre 13.

Gitug-an ni Police Chief Inspector Mercy Villaro, ang tigpamaba sa MCPO, nga tinguha nila nga mas masabtan pa ang maong sakit, alang na usab diha sa pagpakig-sandurot diha sa publiko.

Kasagaran sa mga gipaubos sa orientation ug sa test ang mga police nga kasagarang anaa sa field, ug kasagrang' mga frontliners, sama sa investigator, sakop sa police relations office, desk officer ug uban pa.

"We initiated this HIV orientation and test in coordination with City Health Office for self awareness and ma-share nato sa public what really HIV is, and that di angay likayan ang mga tawo nga adunay HIV, gani mas angay sila og dugang suporta ug pagtagad," pagpasabot ni Villaro sa Superbalita Cebu.

Gipasabot usab sa mga sakop sa City Health Office ngadto sa mga police kon unsa mga paagiha nga malikayan ang sakit nga HIV aron makatabang usab diha sa pagpasabot sa publiko.