AMAHAN nga hubog nitigbas sa iyang kapuyo ug duha ka mga anak niadtong Dominggo, Septiyembre 20, alas 9:00 sa gabii sa Lower Calajoan, lungsod sa Minglanilla.

Si Decsan Tibudan, 43, suspek nga amahan, nadakpan sa mga miresponding pulis.

Kritikal ang iyang kapuyo nga si Irene Chan Paran, 31, ug luwas na ang ilang kaluha nga anak babaye ug lalake nagpangidaron sa 9 anyos.

Si Irene nakaangkon og samad tinigbasan sa iyang tangkugo, ulo ug ubang parte sa lawas.

Ang mga bata naigo sa ulo ug ubang parte sa lawas ang samad.

Si Police Master Sgt. Retchel Antipuedto, imbestigador sa Minglanilla Police Station nga nahinabi sa Superbalita Cebu, nagkanayon nga ang mga biktima uban sa suspek diha sa ilang lawak atol sa krimen.

Matud pa nga nagkalalis si Irene ug ang suspek human iyang gisultihan nga ipadlong ang anak sa unang asawa niini nga tua sa kauluhan nga magsige og chat og binastos.

Ang suspek hubog ug iyang gitigbas si Irene lakip n ang mga bata. Nakadagan ang mga biktima ug nanawag og tabang sa mga silingan.

Nadakpan ang suspek sa kapulisan ug ang mga biktima, gidala sa tambalanan ss dakbayan sa Sugbo, labina sa kapuyo nga kritikal ang kahimtang.

Kasong frustrated parricide ang giandam na sa kapulisan ang ipasaka batok sa suspek nga amahan nga gitanggong sa presinto sa kapulisan. (GPL)