Gikatahapang karnaper nga dunay duha ka mga warrant of arrest nadakpan sa kapulisan tungod sa Facebook post sa kapulisan sa lungsod sa Barili.

Matod sa hepe sa Barili Police Station, Police Captain Romeo Caacoy Jr., nga iyang gituyo sa pag post ang mga hulagway sa mga wanted sa lungsod aron sila matabangan sa publiko sa pagtudlo kon hain sila nagtago.

"Halos mga tawo karon duna na may Facebook, mao na nga pinaagi niini ug ilang makita ug ilang ipahibalo sa amoa. Total pabilin man nga itago ang ilang pangalan. Mas dali nato madakpan kadtong atong gipangita,” sulti ni Caacoy sa Superbalita Cebu.

Tuod man, ilang natultolan ang nahimutangan sa usa sa mga most wanted person nga taga Barili, apan ang duha ka mga kasong carnapping naa sa Dakbayan sa Mandaue ug Dakbayan sa Naga.

Ilang natultolan ang nahimutagan ni Juan Manigos Madrid, 47, lumad nga taga Barangay Malolos, Barili, apan naa na nagpuyo sa Barangay Pung-ol Sibugay, bukirang barangay sa Dakbayan sa Sugbo.

Niadtong Martes sa hapon, Nobiyembre 17, 2020, si Madrid ilang nadakpan sa may Freedom Park, sa Carbon Market, Dakbayan sa Sugbo nga namaligya og used nga mga sapatos.

Uban kanila ni Caacoy ang Regional Special Operations Group (RSOG) 7 sa Regional Intelligence Division (RID).

Gidakop si Madrid base sa duha ka warrants of arrest, ang usa ni Judge Dalisay Chaves Ohdate sa Mandaue City Regional Trial Court Branch (RTC) Branch 85 sa kaso nga kalapasan sa Republic Act (RA) 10883 kun Anti Carnapping Act of 2016, nga dunay piyansa P300,000 sa iyang temporaryong kagawasan ug ni Judge Don Felix Gumalo sa RTC Branch 76 sa Naga City sa susamang kaso nga dunay piyansang P180,000.

Nagtuo si Caacoy nga ang pagpamaligyag mga sapatos ni Madrid usa lang ka takuban sa iyang kalambigitan sa pagpangawat og mga motorsiklo.

Si Madrid nakugang dihang gidakop, apan nikalma siya sa iyang pagkasayod sa duha ka mga warrant of arrest gikan sa korte sa kasong carnapping.

Matod niya nga tinuod dunay mga motorsiklo nga gipamalihug sa iyang mga ig-agaw sa pagpabaligya kaniya.

Wa siya masayod kon unsa kini kay ang iyang pangitaon buyer lang.

Matod ni Caacoy nga ila pang imbestigahon og maayo si Madrid. (BBT)