GIBASURA sa Sandiganbayan 7th Division ang kasong graft and corruption batok ni kanhi Lapu-Lapu city mayor ug kanhi Congressman Arturo “Boy” Radaza ug laing 15 ka mga city official gumikan sa reklamong overpriced sa pagpamalit og computer units niadtong 2005.

Nisang-at og reklamo ang negosyante nga si Efrain Pelaez Jr. nga matod pa gipasobraan ang presyo sa matag unit sa computer nga kapin lang sa P23,000, apan ang Siyudad nipalit niini sa tag-P49,950 matag usa.

Miabot ngadto sa P23.4 milyones ang kinatibuk-ang gibayad sa Lapu-Lapu City Government atol sa pamunoan ni Radaza alang sa 479 ka computers nga gigamit sa public high schools sa dakbayan.

“The allegation of overpricing under the information lacked basis and the prosecution failed to prove it, using the same documents used during preliminary investigation... Evidence is insufficient to support a conviction,” tipik sa natala sa maong desisyon sa Sandiganbayan nga gipirmahan ni Associate Justice Ma. Theresa Dolores Gomez-Estoesta nga pinitsahan og Oktubre 18, 2019.

Napakyas ang prosecution sa pag-presentar sa actual canvass sheets aron unta makita ang market price sa computer units ug uban pang ebidensiya.

“Ang katinuoran ug hustisya sa kaso nga walay basehan motumaw gayud. Justice and truth will win over malicious prosecution,” mubo nga reaction ni Radaza, kinsa didto sab sa Sandiganbayan atol sa pagbasa sa desisyon.

Mga na-absuwelto naglangkob nila ni Radaza, kanhi city administrator Teodulo Ybanez, Bids and Awards Committee members Michael Dignos, Victoria Andoy, Elena Pacaldo.

Lakip sa gikiha sila si Engr. Rogelio Veloso, nangulo sa Technical Working Group ug miyembro niini nga sila si Dr. Cipriano Flores, Engr. Sharon Baguio, Buenaventura Igot, Jericho Mercado, Engr. Maribeth Sorono, Marita Guiao, Cleofe Solis, Leandro Dante, Ernesto Imbong, Rogaciano Tampus, ug ang computer supplier Jennet Valencia. (FVQ)