Gikonsiderar sa kapulisan nasulbad na ang kasong pagtulis-patay sa usa ka 16 anyos nga tinun-an nga si Jerome Estan, 16, niadtong Sabado sa gabii, Agusto 6, 2022, sa Barangay Bulacao human gisang-at ang kasong robbery with homicide batok sa lima ka mga batan-on nga suspek sa krimen.

Gipasabot ni Police Lieutenant Colonel Wilbert Parilla, deputy city director for administration sa Cebu City Police Office (CCPO) nga sa dihang nadakpan nila ang tulo sa lima ka mga suspek ug niangkon nga kauban sila sa krimen matawag na kini nga sulbad na.

Bisan pa man nga menor de edad, ang upat ug usa lang ang sakto na sa pangidaron mahimo na sila nga ikiha sa korte sanglit pulos man sila 15 anyos pataas nga maoy gilatid sa balaod sa Pilipinas.

Kadto lamang nagpangidaron og 15 anyos paubos ang dili mamahimong ikiha bisan pa man kon siya ang naghimo sa krimen sanglit wala man siyay liability niini sigun sa batakang balaod.

“Ang exempted lang sa criminal liability kadto lang nag edad og 15 anyos paubos, so kanang atong gi filan og at-large nga minor more than naman sya sa 15. pwede gihapon nato sila nga makasohan,” matod ni Parilla.

Giklaro hinuon ni Parilla nga mamahimo pa nga ipadayon ang manhunt operation sa magsuon nga pulos menor de edad bisan pa man nga nasang-at na ang kaso sa piskaliya.

Gituohan nga naa pa kini sa Bulacao o sa mga silingang barangay nagtago sa panimalay sa mga higala niini sanglit wala naman silay ginikanan nga nag-atiman kanilang duha.

Gitahasan ni Parilla ang Inayawan police station nga panid-an ang mga dapit nga mamahimong gitagoan sa magsuon dungan sa awhag sa mga higala niini nga maoy mitago kanila nga itahan na lang kini sa kapulisan aron manubag sa salaod nga ilang nahimo.