NABUAK ang itlog ug nagusbat ang tibuok kinatawo sa usa ka lalake human maligsi sa ten-wheeler garbage truck pasado alas 7 Lunes sa buntag sa dalan MJ Cuenco, corner T. Padilla, Barangay Tejero, Siyudad sa Sugbo.

Gituohan nga ang lalake nga giingong naa lang sa karsada nagpuyo ug wa pa mailhi sa pagsuwat ning taho, nisuway sa pagpakamatay pinaagi sa pagpaligis kon basehan ang sulti ni Rogelio Roca, drayber sa trak.

Si Roca, 51, lumad nga taga Toledo City, nagkanayon nga iyang nakita ang lalake nga daw sa wala sa huna-huna nga kalit lang nagpatunga sa karsada.

Nilikay siya sa lalake pinaagi sa paglubag sa manubela aron di maigo, apan giingong migakos kini sa ligid sa truck hinungdan nga nalatayan ang katunga sa lawas.

Mga tawo nga nakakita naninggit nga adunay tawo nga naligsan hinungdan nga siya nihunong.

Dali nga gidala ang lalaki sa Cebu City Medical Center (CCMC) ug anaa sa kritikal nga kahimtang human mabuak ang mga itlog niini.

Hangtod ning pagbalita, naa pa sa talandugon nga kahimtang ang lalaki sulod sa tambalanan.

Matod ni Police Major Joemar Pomarejos, hepe sa Waterfront Police Station, ang biktima libud suroy ug way bisan usa ka tawo sa dapit nga nakaila niini.

Siya nidugang nga naigo ang ubos nga bahin sa lawas apan padayon pa nga giobserbahan sa mga doktor.

“Sir, naigo sa lower extremities nya naigo ang may pelvic area mao na naigo ang iyang itlog,” matod ni Pomarejos.

Kasamtangan nga gi kustodiya sa Waterfront Police Station si Roca samtang wa pay niila sa biktima ug wa pa usab moabot ang oras nga moreklamo ang kabanay niini.

Apan gibutyag ni Roca nga wa siyay sala.

Gani nilihay pa siya niini sa dihang nagpatunga sa karsada ang lalake samtang siya padung sa Barangay Carreta aron mokuhag mga basura.

Gi-impound ang dumptruck nga gimaneho ni Roca.

Ang trak iya sa usa ka pribadong kompaniya nga maoy gi-hire sa Kagamhanan sa Siyudad sa Sugbo sa pagkolekta sa mga basura sa dakbayan.