Napatay sa kapulisan ang usa ka gikatahapang kidnapper atol sa giingong pakigpinusilay niini tali sa joint team sa Anti-Kidnapping Group Visayas Field Unit (AKG-7-VFV) ug Minglanilla Police Station alas 11:15 sa Dominggo sa gabii sa Sitio Bantayan, Barangay Tungkop, lungsod sa Minglanilla.

Si Joavani Bogo, alias Vani, hingkod, dunay kapuyo namatay sa pagsukol niya sa team sa kapulisan pinanguluhan ni Police Executive Master Sergeant Zosimo Ravanes.

Si Bogo nakuhaag usa ka .38 kalibreng revolver nga dunay mga bala.

Si Police Staff Sergeant Ernest Laspuña, sa Minglanilla Police Station nga nahinabi sa Superbalita Cebu, niingon nga ilang gipanid-an si Bogo.

Si Bogo maoy primary suspect sa pagdagit sa usa ka lalake niadtong Hunyo 2, 2020 gikan sa parking lot sa usa ka unibersidad sa Dakbayan sa Sugbo.

Si Bogo, kinsa nakabantay sa kapulisan, giingong namusil kanila hinungdan nga nahitabo ang pinusilay.

Si Bogo naigo sa nagkadaiyang bahin sa iyang lawas.

Ang kapulisan padayon pa nga nangita sa biktima, kinsang ngan ug uban pang mga detalye sa kidnap gipugngan una sa kapulisan kay nagpadayon pa ang ilang operasyon.

Matod ni Laspuña nga si Bogo ilang high value target (HVT) sa illegal drugs, nalambigit sa gun running sa Lalawigan sa Sugbo ug kidnapping. (GPL)