Wala katiwas sa pagtan-aw sa salida sa TV ang usa ka lolo human gipusil-patay sa wa mailhing killer alas 7:50 sa Biyernes sa gabii sa Sitio Mahayahay, Brgy. Maslog, dakbayan sa Danao.

Si Saturnino Mansueto, 68, minyo, patay diha-diha human nakaangkon og samad pinusilan sa ulo ug kalawasan.

Matod ni Police Corporal Mark Anthony Manulat sa Danao City Police Station, sila nakadawat og tawag sa telepuno gikan sa concerned citizen alas 8:20 sa gabii kabahin sa insidenti.

Sa pag-abot nila sa lugar, nagbuy-od na si Mansueto ug dunay samad pinusilan sa ulo ug kalawasan.

Ang mga kabanay ningbutyag nga nagtan-aw og salida sa television ang biktima.

Kalit nga niabot ang gunman dayon nanuktok sa ilang steel door.

Nibarog si Mansueto ug nangabli dayon sa pultahan samtang ang gunman diretsong namusil.

Sa pagkahagba, gitiwasan pagpusil si Mansueto sa gunman tumong sa lawas sa makadaghang higayon.

Gisubay pa sa kapulisan kon unsay motibo sa kremin.