KONSEHAL sa Lungsod sa Aloguinsan namatay sa tambalanan sa Dakbayan sa Sugbo human gibunalan og tubo sa iyang silingan alas 8:50 sa gabii sa Miyerkules, Septiyembre 29, sa Sitio Bogo, Brgy. Kawasan.

Si Guillermo Pabroa, 58, minyo, nagpuyo sa nahisgutang lugar, chairman sa committee on environment sa Konseho sa Lungsod sa Aloguinsan namatay sa Vicente Sotto Memorial Medical Center (VSMMC) sa ala 1 pasado sa Huwebes sa hapon.

Nasikop si Richard Siacor, 48, minyo, way trabaho, silingan ni Pabroa.

Si Police Staff Sgt. Christian Elijay, sa Aloguinsan Police Station nga nahinabi sa Superbalita Cebu, nagkanayon nga si Siacor nanghagis.

Nagdala kini og G.I. pipe o tubo nga pinutol, gipusposan ang jalousy nga bintana sa balay ni Sacarias Ariola.

Wala matagbaw si Siacor, iyang giguba ang peso wi-fi ni Ariola pinaagi sa pagpuspos og tubo.

Gumikan sa kaguliyang, si Pabroa, nibadlong kang Siacor ug iyang gikasab-an kay nakamugnag kasamok sa ilang dapit.

“Human niyag kasaba, nitalikod si Konsehal kay milakaw, pero gikalitag bunal ang ulo sa tubo nga gidala sa suspek,” dugang ni Elijay.

Nahagba ang konsehal gumikan sa kakusog sa pagbunal ug nawad-an og panimuot.

Human makadawat sa alarma ang kapulisan, dali nilang giadto ang dapit, nasikop si Siacor.

Ang konsehal nadala sa tambalanan sa Dakbayan sa Carcar, apan gumikan sa kadaot sa ulo, siya gibalhin sa VSMMC, diin siya namatay.

Matod ni Elijay nga si Siacor nasuko kang Ariola kay ang iyang anak nga nadasmagan sa motorsiklo giingong wa atimana sa ospital.