Ang Cebu City Council mopatawag sa mga representante sa contractor sa Cebu Bus Rapid Transit (CBRT) system aron sila ma-update sa padayong pagtrabaho sa Package 1 sa P16.3 bilyunes nga proyekto.

Si Cebu City south district Councilor Rey Gealon nipasar og resolution atol sa regular session kagahapon, Hunyo 7, aron sila mahatagan og katin-awan batok sa nigawas nga balita nga mohunong sila og trabaho sa 2.38 kilometro nga Package 1 sa Osmeña Blvd. kon dili pa sila mahatagan sa mobilization fund gikan sa National Government.

“News discloses that the private contractor Hunan Road and Bridge Construction Group Ltd. of the Cebu Bus Rapid Transit (CBRT) Package 1 has threatened to stop its construction works if the Department of Transportation (DOT) cannot release the agreed initial 10 percent of the total contract as mobilization fund,” mabasa sa tipik sa resolution ni Gealon.

Ang first termer nga konsehal nagkanayon nga dako kini nga problema kay makapahunong kini sa mga construction work sa CBRT, nga mahimong makahasol sa libuan ka mga pasahero sanglit malangay ang paghuman sa proyekto kansang target paghuman karong Disyembre 2023.

Atol sa session, wala pa matino kon unsang adlawa ipatawag ang mga opisyal sa Hunan Road and Bridge Construction Group Ltd. alang sa executive session apan gipadayag ni Gealon nga susihon pa sa secretariat ang partikular nga petsa ug pahibaw-on ang contractor sa labing dali nga panahon.

Ang DOTr gihatagan og hangtod Hunyo 15 sa pagbayad sa kantidad nga gikasabutan, sumala pa ni City Councilor Jerry Guardo, chairman sa committee on infrastructure sa Konseho sa dakbayan.

Ang Package 1 nagkantidad og kapin P900 milyunes, nga gitrabaho sa contractor bisan kon wala pa mahatag ang mobilization fund aron maapas nila ang target sa paghuman.

Si Engr. Norvin Imbong nipadayag nga paingon na pirmahan ang tseke.

Ang Package 1 naglangkob sa 2.38-kilometros nga segregated bus lane nga adunay upat ka bus stations ug ang Package 2 adunay 10.8 ka kilometro, samtang ang Package 3 moabot og 22.1 kilometro ang gitas-on, nga pulos pa wala mapaubos sa public bidding gawas sa Package 1.