Nasunog ang kwarto sa usa ka balay pasado alas 12 sa Miyerkules sa udto sa dan Ramon Aboitiz, Barangay Kamputhaw, Dakbayan sa Sugbo.

Matod ni SFO1 Riza Julve sa Cebu City Fire Office (CCFO) nga ilang gisusi kon di ba electrical overload ang hinungdan sa sunog human nila masayri nga dunay nag welding sa dapit.

Si Julve niingon nga ang balay gipanag-iya ni Belen Amodia samtang ang kwarto giukopar sa iyang anak nga si Crisanto Amodia.

Ilang nadawat ang alarma sa sunog alas 12:04 sa udto ug giisa kini sa first alarm sa alas 12:10 sa udto.

Paglabay sa upat ka minuto, gideklarar kini nga under control samtang hingpit nga napawong sa alas 12:17 sa udto.

Matod ni Julve nga upat ka mga pamilya ang nagpuyo sa balay.

Ang sunog nagbilin og danyos nga P108,000.