CEBU City Mayor Edgardo Labella malaumon nga mapaubos ang quarantine status sa dakbayan, samtang ang direktor sa Police Regional Office (PRO) 7 di uyon nga lugakan ang community quarantine sa siyudad.

Ang mayor nagkanayon nga bisan kon ang Cebu City maoy adunay labing daghan og aktibong kaso sa Covid-19, apan labaw ang gidaghanon sa mga individual nga naayo sa coronavirus.

Bisan pa man, si Labella miingon nga ilang tahuron ang desisyon sa Inter Agency Task Force ( IATF) sa resulta sa ilang deliberasyon nga basehan sa pag-anunsiyo ni Presidente Rodrigo Duterte, karong adlawa, Hulyo 15, 2020.

Apan alang kang Police Brigadier General Albert Ignatius Ferro, hepe sa PRO 7, nga dili pa angayan nga luagan ang community quarantine sa Cebu City tungod kay taas pa gihapon ang kaso sa nagpositibo sa coronavirus sa syudad ug angayan lang nga inanay ang pagpaluag sa quarantine status.

Gipasabot ni Ferro nga kinahanglan bantayan kung ang kaso sa Covid-19 padayon nga magsaka ug igo pa ba ang mga pasilidad aron moatiman sa mga tawo nga nagpositibo sa coronavirus lakip na ang mga tambalanan una pa mohatag sa desisyon ang IATF.

Nabantayan karon ni Ferro nga aduna nay kalamboan ilabi na nga ubos nalang ang mga nataptan sa Covid-19 itandi sa nanglabay nga mga semana.

Base sa talaan sa Department of Health niadtong Hulyo 12, ang Cebu City adunay 7,439 ka kaso sa Covid-19 apan 3,778 na ang nangaayo kon 51 porsento ang recovery rate.

Sa pagkakaron, adunay 3,292 ka mga aktibo nga kaso ang Cebu City diin ang tanan naa sa isolation centers ug tambalanan.

Si Labella nidugang nga kon unsay hukom sa national IATF, mao kini sundon sa Cebu City apan kon siya maoy pabut-on labing maayo nga mapaubos ang quarantine classification ngadto sa GCQ para mohinay-hinay na og bangon ang ekonomiya nga nahagba gumikan sa epekto sa Covid.

Subli nga gipanawagan sa mayor nga ipatuman ang social distancing, pagsul-ob og mask, kanuhay nga manglimpyo sa kamot ug dili mosagol sa daghang mga tawo. (PAC, AYB)