GIINDURSO ni Mayor Edgardo Labella si Police Colone Arnel Banzon ngadto sa Police Regional Office 7 para maoy molingkod isip officer-in-charge sa Cebu City Police Office (CCPO).

Si Labella nipadala og suwat niadtong Nobiyembre 4 ngadto kang P/Brig. Gen. Valeriano De Leon, pangulo sa PRO 7, para ibutang si P/Col. Arnel B. Banzon kansang posisyon temporaryong gidumala ni P/Col. Geovanie Maines, ang deputy regional director for operation sa PRO 7.

“I am positive that with (Banzon’s) qualifications and experience, he will be of great service to the City of Cebu, matod ni Labella.

Si Banzon nahimong full pledged colonel kapin tulo ka buwan na ang nakalabay ug kasamtang nadestino sa Directorial Staff ug maoy chief sa Regional Operation sa PRO 7 ug nahimong hepe sulod sa dugay nga panahon sa Special Weapons and Tactics (Swat) sa CCPO.

Nahimo sab nga deputy city director for operation si Banzon sa panahon ni P/Brig. Gen. Noli Romana dihang si Bise Mayor Michael Rama pa ang mayor sa dakbayan.

Si Banzon usa ka lumad sa Sugbo ug anak ni kanhi P/Col. Pepito Banzon kinsa naghupot usab og dagkong posisyon sa PRO 7 kaniadto. Ang posisyon sa pagka-City Director nahimong bakante human girelibuhan si P/Col. Gemma Vinluan gumikan sa kontrobersyal nga pag-ambush patay ni kanhi Clarin Mayor David Navarro luwan sa patrol car paingon sa prosecutors office niadtong Oktubre 25, 2019. (PAC)