TULO ka mga department head nga mga tinudlo ni kanhi gobernador ug karon Bise Gobernador Hilario Davide III, ang gibalhin og duha ka local government units sa lalawigan sa Sugbo ug buhatan sa Kapitolyo sugod niadtong Huwebes, Hulyo 4.

Kini mao sila si Provincial General Service Officer Jone Siegfred Sepe, kinsa gi-detail sa kagamhanan sa lungsod sa Barili; Provincial Agricuturist Roldan Saragena, kinsa gi-detail sa lungsod sa Pinamungajan ug Provincial Assessor Alma Sibonga, kinsa gi-reassign sa I-Tax nga buhatan sa Kapitolyo.

Sigon ni Gobernador Gwen Garcia si Sepe patabangon sa inventory sa mga propiyedad sa Barili human ang maong LGU nihangyo nga tabangan.

Gitudlo isip officer-in-charge sa PGSO si Bernard Calderon, ang assistant ni Sepe.

Si Saragena, matod ni Garcia, patabangon sa LGU sa Pinamungajan sa pagpalambo sa nursery niini ug aquafarming project.

Si Aylen Cielo, aquaculturist II, ang magsilbi nga OIC sa Provincial Agriculture Office; ug si Mariflor Vero ang gitudlo nga OIC sa Provincial Assessor’s Office.

Samtang, si Marivic Garces, pangu sa Provincial Social Welfare and Development Office ang gi-reassign sa Provincial Disaster Risk Reduction and Management Office. Si Baltazar Tribunalo, pangu sa PDRRMO, naa gihapon sa maong buhatan. (SCG)