GILAUMAN nga sugdan ang ikaduhang hugna sa SUGBUsog (Sugbuanong Busog, Luwas ug Himsog) sa kalungsoran sa lalawigan sa Sugbo sa Mayo.

Usa sa mga bag-ong atangan sa mga lungsod mao ang indigay sa best local government unit (LGU).

Subay sa impormasyon sa Kapitolyo, gikatakda ang evaluation sa Marso 22-26 alang barangay level; sa Abril 5-9 alang sa municipal level; Abril 12-16 alang sa district level ug Abril 19-30 alang sa provincial level.

Ang contest naglangkob sa mga kategoriya: best household ug best purok sa barangay level, best barangay sa LGU ug district levels ingon man ang grand champion sa household, purok, barangay ug LGU levels.

Si Dr. Roldan Saragena, nangulo sa Provincial Agriculture Office, nagkanayon nga makakuha og dugang puntos ang mga partisipante nga moatiman usab og native nga manok ug aquaponics system alang sa mga isda.

Ang Kapitolyo mi-download na og moabot P100,000 nga pundo sa mga LGU alang sa barangay, samtang laing P1 milyon alang sa mga syudad ug kalungsoran.

Katunga sa pundo alang sa pagpalambo sa nurseries samtang ang katunga alang sa pagpatuman sa naasoyng programa.

Atol sa tigom sa mga mayor sa miaging semana, gipasabot ni Cebu Governor Gwendolyn Garcia nga mohimo og sistema ang kagamhanan nga mahimong patas ang indigay alang sa mga gagmay ug dagkong purok.

“Naa’y mga barangay nga dagko. Naa say mga barangay gagmay kaayo, gagmay ra’g purok. Ato ning tan-awon ang inyong population per barangay. We might come up with three categories – small, medium, large. Para ma-level ang playing field...Small barangays will be competing with small barangays ug ang dagko sa parehas niya nga dagko, para fair. Buot ipasabot ana mas daghan ta’g premyohanan,” matod ni Garcia.

Ang SUGBUsog usa ka programa nga gisugdan ni Garcia sa Abril 2020 subay sa tinguha nga mahimong paigo ang supply ug pagkaon sa mga Sugboanon taliwa sa nasinati nga krisis tungod sa pandemya. (ANV)