Duna na say tawo nga nisuway paghikog sa unang Mactan-Mandaue bridge sa Biyernes sa gabii, Hunyo 11, 2021, apan naluwas human gipahibawo sa usa ka mananagat ang mga sakop sa usa ka fraternity.

Ang 24-anyos nga lalake taga Barangay Umapad, Dakbayan sa Mandaue daling naluwas sa mga sakop sa Alpha Kappa Rho (Akrho) nga nagpuyo duol sa baybayon sa Barangay Pajo nga niresponde human mopahibawo ang mananagat sa pagtugpa sa lalake.

Naabtan pa sa mga fratman nga dunay panimuot sa dagat ang lalake.

Si Lapu-Lapu City Mayor Junard “Ahong” Chan niingon nga sa iyang pagpakighinabi kang Jojo (di tinuod nga ngan) nga dunay siyay dakong personal nga problema.

Wa na motug-an pa si Jojo kon unsa ang iyang problema dihang gipangutana ni Chan.

Gipasalamatan ni Chan ang mga sakop sa Akrho nga daling niluwas kang Jojo ug nidala niini sa baybayon.

Si Jojo daling gidala sa Lapu-Lapu City Hospital pinaagi sa Emergency Rescue Unit Foundation (ERUF) alang sa dugang pag-atiman.

Dunay awhag si Chan sa mga tawo nga dunay bug-at nga problema.

“Panawagan usab sa tanang Oponganon, dili gayud makiangayon nga tapuson ang kinabuhi kung adunay problema kay ang problema lumalabay ra,” matod sa mayor. (REV)