Gidunggab patay sa 51-anyos nga lalake ang iyang kapuyo atol sa ilang init nga panaglalis kabahin sa usa ka “third party” ala 1:09 sa kaadlawon sa Sabado, Hunyo 19, 2021 sa Semense B, Barangay Tipolo, Mandaue City .

Giila ang biktima nga si Hazel Haynar, 41, nag-abang sa Semenese B, Barangay Tipolo.

Giila ang suspek nga si Jun Villodo Manata, 51, live-in partner ni Haynar, lumad nga taga San Ramon, Sorsogon.

Matod ni Police Lieutenant Col. Mercy Villaro, tigpamaba sa Mandaue City Police Station, nga base sa imbestigasyon, gituohang third party ang gilalisan nila ni Haynar ug Manata.

Ang panaglalis sa duha nagsugod sa gabii sa Biyernes, Hunyo 18, 2021, hangtod sa kaadlawn sa Sabado.

Matod ni Villaro nga naandan ra sa mag-live in partner nga magsige og lalis ug away apan, sa gabii sa panghitabo ang kinagrabehan nila nga panaglalis.

Sigon ni Villaro nga si Manata nagduda nga si Haynar adunay laing gikakita bisan kon walay ebidensya o walay nakitang laing kakita si Haynar.

Apan, miingon si Manata sa imbestigador nga niadtong oras sa silang paglalis, giingnan siya ni Haynar nga “Maypa man nuon tong Insik”.

Sa iyang kasuko, iyang gidunggab makalima sa dughan si Haynar gamit ang 15 puldaga nga kutsilyo.

Nakadawat og taho ang Subangdaku Police Station gikan sa usa ka concerned citizen ug dali silang miresponde sa lugar kuyog ang mga barangay tanod.

Pag-abot sa kapulisan sa crime scene, ilang nakita si Haynar nga naligo na sa kaugalingong dugo.

Ang mga silingan nilang Manata nanawag og tabang sa Mandaue City Disaster Risk Reduction Management Office (DRRMO) diin pag-abot sa lugar wa nay pulso si Haynar.

Sigon ni Villaro nga pagsikop ni Manata, wala siya niikyas o wala misukol ug niangkon siya sa iyang gibuhat.

Kasamtangang, gibilanggo si Manata sa Subangdaku Police Station. (KFD)