BIYAHE gikan sa Ayala Center Cebu paingon sa bukirang barangay sa Guba sa dakbayan sa Sugbo ug biyahe gikan sa lungsod sa Cordova paingon sa dakbayan sa Lapu-Lapu ang gusto i-bidding sa Land Transportation Franchising and Regulatory Board-Central Visayas (LTFRB 7) aron mahibaw-an kon kinsang mga operator nga gustong mopadagan niining mga bag-ong rota.

Ipahigayon ang maong bidding karung Agosto 23, 2019, sigon ni LTFRB 7 director Eduardo Montealto Jr.

Gibutyag ni Montealto nga taas ang demand sa parehong mga rota ug kasamtangan nga wala'y nagbiyahe nga pampublikong sakyanan sa mga dapit.

Ang pag-abli sa maong mga rota parte gihapon kini sa Public Utility Vehicle (PUV) Modernization Program sa gobyerno diin modern jeepneys ang managan sa maong mga dapit.

Sugod alas 9 sa buntag sa Agusto 23, hangtod alas 2 sa hapon, manawat og letter of intent ang LTFRB 7 alang sa mga operator o kooperatiba nga nagplano nga mopadagan og mga units sa maong mga dapit.

Alas 2 sa hapon sa susamang adlaw himuon na ang deliberation sa bidding diin tan-awon ang rekisito sa mga operator kon angay ba i-award sa ilaha ang Notice of Selection.

Alang sa biyahe sa Ayala-Guba, 20 ka units ang ilahang ipa-bid, ug 20 usab ka modern jeepneys sa Cordova-Lapu nga rota.

Matod ni Montealto nga mismo ang local government unit sa Cordova ang nihangyo kanila nga mabutangan og rota sa modern jeep ang maong dapit aron maserbisyohan ning mga commuting riders.

Tan-awon usab ang technical, financial, ug legal capabilities sa mga interesadong operator.

Human sa pito ka adlaw, mohatag na og resolusyon ang LTFRB 7 kon anaa na'y napilian o naa'y failure of bidding.

Dugang sa direktor nga aduna'y survey ang maong mga rota diin mao usab kini ilang gibasehan nga magbutang og mga magdagan nga modern jeep sa dapit.

Ang matag modern jeep kinahanglan og 23 ang seating capacity diin dugang walo ang mamahimo nga idugang isip standing.