NASIKOP sa hiniusang search operation sa National Bureau of Investigation (NBI) ang usa ka Yugoslav national nga adunay nag ung-ong nga kaso sa child prostitution ug sexual abuse ingon man anti-human trafficking.

Atol sa press conference sa NBI Central Visayas sa Mayo 19, 2021, gipahibaw ni Atty. Rennan Oliva nga gi serve ang search warrant nga giluwatan sa Regional Trial Court (RTC) Branch 61 sa Angeles City, Pampanga sayo sa Miyerkules.

Ang suspek giilang si Steve Sinisa Hidosan,taga Yugoslavia apan kasamtangan nga nagpuyo sa lungsod sa Compostela, amihanang Sugbo, kauban ang live-in partner ug duha ka mga anak.

“When he was arrested, he could not show any documents sa iyang stay diri. Wa siya’y passport but based on the investigation sa Anti-Organized Crime Division sa Manila ni SI (special investigator) Rivera, kani siya he has been hiding sa iyang mga kaso,” matod ni Oliva.

Subay sa pakisusi sa buhatan, moabot walo na ka tuig nga nagtago-tagu si Hidosan tungod sa pito ka counts sa child prostitution ug sexual abuse ug lain pa nga walo ka counts sa human trafficking.

Si Special Investigator Agapito Geirran sa NBI-7 nagkanayon nga tag P200,000 ang pyansa sa matag count sa child prostitution samtang way pyansa o lifetime nga pagkapriso alang sa human trafficking case.

Ang suspek nangangkon nga 10 ka tuig na siya nga nagpuyo sa Compostela diin siya namuhi og mga hayop ug manok nga igtatari. Apan ang NBI-7 miingon nga 25 ka tuig na siyang nagpuyo sa lugar.

Tungod niini, gi-awhag sa buhatan ang mga Sugboanon nga posibleng nabiktima sa langyaw.

“We are appealing sa mga residents sa Compostela at sa neighboring municipalities sa Compostela, pwede kayong magreklamo pag may mga complaint kayo against him in Compostela. We did not know what he did in Angeles, he is doing it now here. So you should file a complaint sa NBI para ma ibestigaran and can file additional cases if similar acts have been committed by him sa lugar nato,” matod ni Oliva.

Si SI Cesar Rivera, sakop sa Anti-Organized Trans National Crime Division-Manila, nagkanayon nga dad-on nila sa kaulohan ang langyaw diin siya mo serve sa iyang silot sa pagkabilanggo una i-deport sa gigikanang nasud.

“After documentation dito sa Cebu, dadalhin namin sya sa Manila at i-inform namin ang Branch 61 ng RTC na nahuli na namin siya. Pagka receive siguro ng Angeles kung kailangan siyang dalhin sa Angeles City Jail dadalhin namin siya doon to face the cases filed against him,” matod ni Rivera. (ANV)