GIATUBANG ni Ormoc City Mayor Richard Gomez ang kapitan sa lansta nga ML J. Sayang I nga nidunggo sa pribado ug abandonadong pantalan sa Barangay Ipil ning siyudad nga way saktong koordinasyon sa awtoridad.

Ang lantsa gikan pa sa lalawigan sa Tawi-Tawi sa Mindanao ug niabot sa Ipil sa miaging Biyernes aron magdiskarga og tungog sa tuba.

Kumpleto hinuon sa mga papeles ang lantsa ug way nakitang kontrabando sa pag inspeksyon sa mayor, kapulisan, Philippine Coast Guard (PCG) ug K9 units.

Pero bisan way nakita nga kontrabando, ang importante nga alerto kanunay ang lokal nga kagamhanan ug mga awtoridad para magpabilin ang kahapsay ug kalinaw sa Ormoc.

Gihangyo ni Gomez ang publiko nga i-report dayon sa kapulisan kon dunay kadudahan og lihok nga ilang makita. (JKDP)