GISALIKWAY ni Lapu-Lapu City Mayor Junard “Ahong” Chan ang pasangil sa usa ka konsehal sa dakbayan sa Lapu-Lapu nga giingong mitanyag siya ug P10 milyones ngadto sa mga konsehal sa dakbayan, aron mobali ngadto kaniya.

Mao kiniy giklaro sa mayor human adunay migawas sa social media diin si Konsehal Rudy Potot maoy miluwat sa maong pasangil.

Matod ni Chan walay basehanan ang maong alegasyon sanglit wala siyay ingon ana kadako nga kantidad.

Giangkon sa mayor nga nakakita siya sa maong video ni Potot apan alang kaniya usa kini ka dakong bakak.

Iyang gihagit ang konsehal nga giingong gitanyagan niya og P10 milyones nga mopatim-aw ug pamatud-an ang pasangil.

Wa hatagi og gibug-aton ni Chan ang laing pasangil nga ang Ahong Bayanihan Cares Program nga bisan og kwarta kini sa katawhan nga nag amot-amot alang sa proyekto ug wa kini niya angkona gawas lang nga hands-on siya sa pagtabang atol sa pagtrabaho sa proyekto diha sa mapili-an nga barangay.

Nagduda ang mayor nga nasina lang si Potot sanglit wala kini makahimo og Bayanihan bisan sa kadugay niini isip public servant.

Nagplano karon sa mayor nga mokonsulta sa iyang abogado sa posibleng pagpasaka ug kaso ni Potot may labot sa maong alegasyon.

"Ang konsehal nga dili akoa, akong hangyo ninyo kay gipili man ta sa mga tawo kalimtan nato ang politika kung naay maka-ayo sa kinatibuk-an atong hugopan ug naay di makaayo atong babagan.

“Mao ranay akong hangyo ninyo wa koy kwarta ikahatag ninyo, unsa may ako ikahatag nga kwarta?," matod ni Chan. (GCM)