GIPA-AUTOPSY sa Cebu Police Provincial Office (CPPO) ang lawas sa usa ka sugarol nga namatay human giingong nahulog sa usa ka bakilid nga bahin sa Barangay Buanoy, lungsod sa Balamban dihang gironda ang sugal sa kaka niadtong Dominggo, Marso 29, 2020.

Apan dunay mga pasangil nga si Arnel Marcellones, 29, namatay sa pagkulata sa mga pulis pinaagi sa pag buttstroke.

Kini ang hinungdan nga nimando sa CPPO Director Police Colonel Roderick Mariano kang Balamban Police chief Major Christian Torres sa pagduso og report.

Apan si Torres nanghimakak nga gikulata sa iyang mga sakop si Marcellones kay matod niya nga ang mga bun-og niini gumikan sa pagkaligidligid sa bakilid.

Si Mariano niingon nga iyang gipa-autopsy ang lawas ni Marcellones aron madeterminar unsay namatyan niini.

“Pina conduct ko ng autopsy kung ano talaga yung cause of death. Nung ano kasi may mga ano duon na dinala na nila sa hospital. So namatay siya after na nakapyansa,”matod ni Mariano.

Paabuton lang una niya ang resulta sa autopsy ug imbestigasyon una pa siya mohukom unsay mahitabo sa mga pulis nga gipasanginlan nga nangulata sa dinakpan.

Naligid ra?

Matod ni Torres ang hepe sa Balamban police station nga nakadawat silag report nga adunay nagpahigayon og illegal nga sugal sa Barangay Buanoy.

Dali nga girespondehan sa iyang mga sakop ug ilang naabtan ang mga lalake nga nag pahigayon sa sugal pinaagi sa pagpaaway sa kaka.

Apan kalit nga nanagan ang mga nagsugal sa dihang nakabantay sa presensya sa mga pulis.

Duha sa mga nag sugal ang nakuptan sa mga pulis nga mao silang Fritz Ian Ricafort ug Marcellones.

Tungod sa ka bakilid, nangaligid ang duha, diin ang tiyan ni Marcellones giingong naigo sa bato nga maoy nakaingon nga naglisud sa pagginhawa.

Gibutyag ni Major Torres nga sa dihang gidala nila sa police station aron bilangguon, nagmulo na kini sa kasakit sa iyang tiyan ug naglisud na sa pagginhawa.

Gidala nila dayon kini sa tambalanan aron makurasyonan ug nasuta sa doktor nga niatiman niini nga wa magrabehi. Apan nianang pagka Lunes, Marso 30, sa dihang nakapauli na human makapyansa didto na nakabsan sa kinabuhi sa ilang balay.

“Naa kunoy witness nga gi-buttstroke kunog armalite. During that time, dili man magdalag armalite ang akong intel kay mailhan sila kay nag civilian man sila. Nya mag dala diay silag armalite? Which is questionable na sad kaayo. Murag gipun-an na lang ang estorya bah,” matod ni Torres sa Superbalita Cebu. (AYB)