SAMTANG duna pay ginagmay nga mga landslide matag karon ug unya, si Talisay City Mayor Gerald Anthony “Samsam” Gullas mipahibawo nga gidili una ang leisure biking sa Talisay-Toledo Wharf Access Road nga mas naila nga Manipis Road.

Matod ni Gullas nga mao kini ang nasabutan tali sa Department of Public Works and Highways (DPWH), Disaster Risk Reduction and Management Office (DRRMO) ug City of Talisay Traffic Operations and Development Authority (CT-TODA).

“The bad news: It was agreed by DPWH, DRRMO and our CT-TODA that we will temporary prohibit leisure biking at the Talisay-Toledo Wharf Access Road for the meantime,” matod ni Gullas.

Matod sa mayor nga tungod sa mga pag uwan wan sa nakalabay nga mga adlaw, di matag-an kon duna na ba say landslide hinungdan nga kinahanglan idili una ang leisure biking.

Nagpadayon ang mga clearing operation sa Manipis Road, apan gibuksan na hinuon kini sa tanang matang sa mga sakyanan sugod sa Miyerkules, apan niawhag si Gullas sa publiko sa pag-amping kanunay.

“I hope mosabot lang unta ta. I know nga daghan na ninyo ang gusto mobalik sa Manipis to enjoy the scenery and the fresh air. But dili sad ko gusto nga marisgo sad ang inyong kinabuhi,” dugang ni Gullas.

Ipahibawo ra unya niya kanus-a itugot og balik ang pagpabiseklita sa dapit. (REV)