Makapahimulos na ang mga Sugbuanon sa pagsakay nga libre atol sa peak hours human ang Office of the Vice President (OVP) nilusad sa programa nga Libreng Sakay sa Miyerkules, Agusto 3, 2022.

Ang inisyatiba nga “Peak Hours Augmentation Bus Service (PHABS)- Libreng Sakay,” gipangulohan ni Vice President ug Department of Education (DepEd) Secretary Sara Duterte, gitumong sa pag-abag sa pinansiyal nga bahin sa pasahero ug kapuno sa mga pasaheroang sakyanan sa oras nga tingsakay.

Ang samang programa dungan nga gilusad sa Metro Manila, Davao City, ug Bacolod City. Duha ka buses sa Metro Manila, samtang sa Cebu, Davao, ug Bacolod usa matag dapit.

Sumala sa post sa Facebook page ni Duterte, ang mga bus WiFi-ready, gipahuwaman sa OVP para sa maong katuyoan.

“The DOTr remains committed to work hand-in-hand with other national government agencies, in the pursuit of its goal—to provide an accessible, affordable, comfortable and safe transport service for all Filipinos,” tipik sa pamahayag ni Duterte.

Sa Sugbo, ang bus moserbisyo sa dakbayan sa Sugbo, Mandaue, ug Lapu-Lapu City sa managlahing mga petsa o adlaw.

Ang Mandaue City matag Lunes ngadto sa Martes, alas 7:00 sa buntag ngadto sa alas 10:00 sa buntag ug alas 7:00 sa gabii ngadto sa alas 10:00 sa gabii. Ang pick-up point anha sa Barangay Jagobiao.

Sa Cebu City, ang pickup point anha sa SM Seaside matag Miyerkules ngadto sa Huwebes, alas 6:00 sa buntag ngadto sa alas 9:00 sa buntag ug alas 4:00 sa hapon ngadto sa alas 8:00 sa gabii.

Sa Lapu-Lapu City, ang pickup point anha sa Mactan Economic Processing Zone matag Biyernes ngadto sa Sabado, alas 6:00 sa buntag ngadto sa alas 9:00 sa buntag ug alas 4:00 sa hapon ngadto sa alas 7:00 sa gabii.