Libreng SIM cards sa Globe sa 10,000 students sa Cebu City
DILI mominos 10,000 ka mga tinun-an sa Department of Education (DepEd) Cebu City Division ang makabenepisyo sa programa ug proyekto sa Globe Telecom nga gitawag og "Reinvent learning with Globe" nga gilusad Biyernes, Enero 22, 2021.
Si Adonis Evangelista, regional sales head sa Globe Telecom, nagkanayon nga ang maong mga tinun-an makadawat og libreng sim nga adunay 7 gigabite data matag buwan para sa ilang online class nga maoy gipatuman sa DepEd.
"To provide the students with the capabilities and access to the internet connections during this time of pandemic wherein online classes and activities being done already," padayag ni Evangelista atol sa ceremonial turnover.
Ang pangulo sa DepEd Cebu City Division nga si Rhea Mar Angtud nihangop ug nagpasalamat sa programa sa Globe diin ang Cebu maoy labing una para sa maong programa.
Si Angtud nagkanayon nga ang 10,000 ka SIM cards ilang ihatag ngadto sa mga eskwelahan nga nahimutang sa urban areas.
"Dili matugkad ang kalipay sa Department of Education Division Cebu City with more than 14,000 teachers and almost half a million students population, your SIM cards will be given to our 26 elementary and 9 high schools that is offering special Science classes nga online tanan ang klase," paghulagway ni Angtud.
Ang Globe Telecom maoy mangunay og pang apud-apod sa SIM cards sugod sunod semana diin ang unang benepisyaryo mao ang Abellana National School ug Don Carlos A Gothong Memorial National High School nga labing dagko nga publikong tunghaan sa dakbayan.
Si Dr. Danilo Gudilusao, assistant school division superintendent, nihangyo kang Evangelista nga kon mahimo pun-an og 2,000 ka SIM cards nga adunay 7 gigabite nga data aron maapod ang tanang tinun-an nga nagtanyag og special Science classes butang nga sabotsabotan pa tali sa DepEd ug Globe Telecom.
Si Evangelista nagkanayon nga ang Cebu City Division maoy ilang pilot area ug iyang gidugang nga mosunod usab ang ubang mga division sa umaabot nga panahon diin ang ilang mga tinun-an makabaton og samang benepisyo sa mga estudyante sa dakbayan sa Sugbo. (PAC)
