NAGPADAYON ang subsob nga pagpangita sa lima ka mga piniriso nga naka-eskapo niadtong Lunes sa kadlawon didto sa Manjuyod Distric Jail sa lungsod sa Manjuyod, Negros Oriental.

Nakahigayon sa pag-iskapo ang lima pinaagi sa paggabas sa mga puthawng rehas sa selda nga anaa tungod sa ila ra usab nga gihigdaan.

Si P/Capt. Antonio Jabar, hepe sa kapulisan sa maong lungsod, mitug-an sa Superbalita Cebu nga alas siete buntag nadawat nila ang maong taho kalabot niini.

Apan sa imbestigasyon, nasayran ni Capt. Jabar nga alas tres pa diay sa kadlawon kini nahitabo ug mga alas singko na nadiskobre sa mga naka-duty nga mga personnel sa prisohan.

“Actually, dihang pag head count daw sa mga piniriso sa usa ka selda didto nahibaw-an nila nga kuwangan na ang ihap sa mga napriso,” matud ni Jabar.

Giila ni Jabar ang mga naka-eskapo nga sila si Janly Callao, 39, sa Barangay Matutuata, lungsod sa Tayasan; Julian Paculanang, 39, sa Barangay Ampanangun; ug Lito Pedro, 49, sa Barangay Apanagun, lungsod sa Jimalalud, Probinsiya sa Negros. Ang tulo pulos nag-atubang og kasong rape.

Alng laing duha mao sila si Ronnie Flores, 25, sa Sityo Naguod, Barangay Nagbalaye, lungsod sa Catalina, nga may kasong kalapasan sa paghupot og armas ug Joseph Casido, 24, sa Barangay Cabcaban, lungsod sa Bindoy, nga may duha ka kasong murder.

Dugang ni Jabar nga sa dihang nadawat nila ang maong taho, ang Bureau of Jail Management ang Penology (Bjmp) nakig-alayon gilayon sa kapulisan sa lungsod sa Manjuyod ug sa tanang police station sa Negros Oriental alang sa hotpursuit operation.

Gibutyag ni Jabar nga mipakanaog na usab ang provincial director og directiba ngadto sa tanang mga police station nga nag-awhag niadtong mga kapartidos sa mga ni-iskapo nga hanguyoon kini aron mo-surrender.

Nagtoo si Jabar nga wala pa katabok sa Sugbo ang lima ka mga naka eskapo.

Samtang ang bag-ong wardeen sa Manjuyod District Jail nga si JSinsp.Bryan Roy Mercado miingon nga hangtud karon wala pay bisan usa sa lima ka mga eskape ang mitahan pagbalik apan aduna na sila lead kon asa kini nagtago-tago.

Gumikan sa maong hitabo, si Mercado kinsa niadto lang Pebrero 1 miasumir sa puwesto daling girelibohan uban sa laing lima ka mga jail officers samtang ipahigayon usab ang imbestigasyon.

“Sa tinuod lang, niadtong Feb 01 ang akong effectivity pag-asumir. Apan mihangyo ko sa akong superior nga Lunes nako report kay gikan man ko sa Bohol, ingon ni ni Mercado

Si JSinsp.Angelito Almojel mao una ang gitudlo nga bag-ong jail wardeen sa maong lungsod. (BBT)