MI-PLEAD not guilty ang akusado sa pagpatay sa dalagang si Christine Lee Silawan atol sa arraignment sa iyang kasong murder sa sala ni Regional Trial Court (RTC) Branch 70 Judge Christine Muga-Abad Biyernes sa buntag, Hunyo 7.

Wa na moluwat pa og pamahayag si Renato Llenes sa iyang kalit nga pagbakwi sa iyang unang mga pamahayag nga mo-plead guilty siya sa kaso aron mahuman na dayon.

Apan ang iyang abogado, manlalaban Manuel Degollacion Jr., nipasabot nga ang pag plead not guilty sa iyang kliyente wa nagpasabot nga iya nang gibakwi ang iyang unang pamahayag nga siya ang nagpatay ni Silawan.

Gusto lang niya nga ma-downgrade ang kasong murder ngadto sa homicide.

Matod ni Degollacion karon nga ni plead not guilty si Llenes, hayan paminawon pa sa korte ang ilang habig sa ilang plano pagprobar kon mo-qualify sa kasong murder o di ang kaso.

Kon ma-downgrade sa kasong homicide, hayan mo-plead guilty na kini, sumala pa ni Degollacion. Iya usab gisalikway nga paglangay-langay lang sa kaso ang ilang gibuhat.

Ang kasong murder adunay mas bug-at nga silot itandi sa homicide.

“The strategy of the defense lawyer is to see it that the sentence to be imposed with the accused is a lower degree. That is the duty of the lawyer,” pagpasabot ni Degollacion.

Nakugang

Ang prosekusyon nga gipangulohan ni Fiscal Ruso Zaragosa nasurprisa sa gibuhat ni Llenes sanglit si Degollacion mao ang iyang abogado dihang niluwat kini sa iyang extra judicial confession.

Matod ni Zaragosa di hinuon kini ang unang higayon nga mag-usab usab ang huna-huna sa usa ka akusado.

Si Assistant Prosecutor Sheilamar Abadia sa prosekusyon nibutyag nga misuway unta og plea bargain si Llenes nga mo plead guilty sa kasong homicide, apan ilang gibalibaran.

Matod ni Abadia “heinous crime” ang gibuhat ni Llenes hinungdan nga murder ang ilang gipasaka.

“Pwedi ta siguro to mosugot mi og plea bargain kon weak ang among evidence. But in this case, strong kaayo ang evidence namo. Dili mi mosugot sa homicide,” matod ni Zaragosa.

Wa makurat

Wa na makurat pa ang kapulisan sa Siyudad sa Lapu-Lapu sa kalit nga pagbali ni Llenes.

Matod ni Police Lieutenant Colonel David Señor, deputy city director for operation sa LLCPO, nga mahimong nausab ang iyang huna-huna atol sa iyang pag-angkon sa pag patay ni Silawan human natambagan sa iyang abogado.

Dugang ni Señor nga bisan pag mi plead guilty pa si Llenes, dunggon pa gihapon kini sa korte ug dili mahimong ideretso siyag kombikto sa kaso tungod kay ipaagi siyag proseso.