ORMOC City, Leyte - Usa ka lola ang gipusil-patay sud sa iyang panimalay sa Purok 3, Barangay Cagbuhangin ning dakbayan niadtong Martes sa alas 6:50 sa gabii, Enero 12.

Giila ang biktima nga si Milagros Toralba, 70, nagpuyo sa nahisgutang lugar samtang ang suspek giila nga si Jochel Pelayo, anaa sa hustong edad, taga Barangay Masarayao, Kananga, Leyte.

Matod sa kapulisan, nakadawat sila og tawag gikan sa usa ka residente nga dunay nahitabo nga pagpamusil sa panimalay sa biktima.

Dali nga miadto ang mga pulis sa lugar aron susihon ang hitabo ug naabtan nila ang biktima nga nagbuy-od ug naligo sa iyang kaugalingong dugo ug wala nay kinabuhi.

Base sa inisyal nga imbestigasyon, samtang nagpahuway ang tiguwang sud sa iyang balay, kalit nga niabot ang suspek dala ang wa matino nga kalibre sa armas.

Gipusil sa makausang higayon sa ulo ang biktima nga miresulta sa iyang hinanali nga kamatayon.

Nisibat dayun ang suspek human sa pagpamusil apan nasikop ra kini human sa gilusad nga manhunt operation pinangulohan ni Police Lieutenant Ramil Caldona, hepe sa Police Station 2.

Atol ning pagsuwat, wala pa makuha sa kapulisan ang armas nga gigamit sa suspek.

Naa na sa kustodiya sa kapulisan ang suspek. (JKDP)