KON ugaling magsugod na pagnihit ang mga bus sa umaabot nga weekends alang sa Pasko ug Bag-ong Tuig, andam ang Land Transportation Office (LTO) 7 nga mopadagan sa mga tourist bus nga gitanyag sa duha ka mga transport company.

Ang Malasakit Libreng Sakay nga gihimo usab sa LTO 7 niadtong nakalabay nga Pasko ug Bag-ong Tuig, andam na usab moserbisyo sa katawhan.

Apan matod ni LTO 7 regional director Vic Caindec nga gitun-an pa nila kon pila ka bus ang ipakatap tungod kay sa ilahang kasinatian niadtong nakalabay nga tuig, grabe ang trapik hinungdan nga dili tanang bus ang nakadagan.

Dugay usab ang turn around sa mga bus tungod sa trapik.

Kining transport company nga SMB Tourist Transport ug Catalina Tourist Bus ang andam nga moserbisyo sa libreng sakay sa mga pasahero.

Kon niadtong nakalabay nga tuig diha sa BSP sa P.del Rosario ang pickup alang sa paingon sa Starmall, Talisay, possible nga sa N.Bacalso na kini aron dali matultolan sa publiko.

Samtang diha sa Plaza Independencia maggikan ang paingon sa SM Consolacion.

Lakip sa pagpangandam nga gihimo sa LTO 7 alang sa holidays kining gamiton ang Malasakit Lounge sa panahon nga daghan na ang pasahero sa Cebu South Bus Terminal.

Ingon man nakigtambayayong na sila sa Philippine National Police alang sa roadside random inspection hilabi na sa mga overloaded nga pampasaheroang sakyanan nga dili tugutang mobiyahe labi a ning panahona. (HBL)