Ang Cebu City Government ug Cebu-Cordova Link Expressway (CCLEX) nibisita na sa mga lugar nga posibleng maapektohan sa pagtukod sa rampa gikan sa V. Rama Ave. paingon sa CCLEX isip magsilbing dugang access sa bag-ong taytayan.

Si Raquel Bohol-Arce, pangulo sa Cebu City Transportation Office (CCTO), nagkanayon nga ilang gisubay ang mga dapit gikan N. Bacalso Ave. paingon sa Barangay Pasil diin adunay mga panimalay nga mademolis.

Gawas sa CCTO, nitambong usab ang mga representante sa Division for the Welfare for the Urban Poor, ug City Planning and Development Office.

Wala makatambong ang mga representante sa Department of Public Works and Highways (DPWH) 7.

Si Arce nagkanayon nga duha ka construction ang mahitabo sa rampa, una ang CCLEX maoy mo-connect niini gikan sa taytayan paingon sa Barangay Pasil ug ang DPWH mao ang mogasto sa pagtukod sa karsada nga maoy mosawo sa rampa paingon sa V. Rama Ave.

Ang pangulo sa CCTO nagkanayon nga kon adunay mga pribadong luna nga maigo, paliton kini sa DPWH pinaagi sa expropriation.

Ang DWUP, DPWH ug ubang buhatan sa City Government mopahigayon sa profiling o socio economic survey karong buwan sa Mayo aron mailhan ang mga balay nga maapektohan ug mahatagan kini og solusyon.

Si Mayor Michael Rama maoy niduso sa maong proyekto aron adunay sayon nga access ngadto sa CCLEX ang mga sakyanan gikan midtown ug uptown area apil na ang gikan sa N. Bacalso Avenue.

Niadtong Nobiyembre 8, ang mga opisyal sa Cebu City Government pinangulohan ni Rama, CCLEX general manager Allan Alfon ug Mayor Cesar Suan sa Cordova nitambong sa ceremonial groundbreaking.