MATALOM, Leyte -- Babaye nga magtutudlo sa college ug iyang kauban nasikop sa Philippine Drug Enforcement Agency (PDEA) 8 ug kapulisan ning lungsod niadtong Dominggo sa gabii, Hulyo 21.

Giila ang magtutudlo nga si Mary Jane Laroa, 23, usa ka licensed teacher, taga Barangay Rizal, Maasin City.

Samtang ang iyang kauban mao si Kevin Lalic, 21, usa ka drug surrenderer, taga Barangay Sta. Fe, Matalom.

Matod sa mga operatiba, gipaubos nila sa pagpaniid ang mga suspek gumikan sa nadawat nila nga mga report.

Gani, dunay uban nga di makatuo nga bisan maestra nag-apil-apil niini.

Apan ang mga awtoridad niingon nga way gipili nga estado ug kalidad sa tawo ang ilegal nga drugas.

Gani, dili lang kini ang unang higayon nga sila nakasikop og mga suspek nga dunay gihuptang papel sa komunidad.

Sama sa mga pulis, jail officer, kawani sa pipila ka lokal nga kagamhanan ug uban pa.

Sa pagpaniid sa mga awtoridad, nagpositibo ang report.

Niini, gilusad sa PDEA, PNP inabagan sa Army ang usa ka joint buybust operation, alas 9:35 sa gabie sa Dominggo.

Nasakmit sa mga operatiba ang walo ka pakete nga may gituhoang shabu nga nagkantidad og P6,000.

Gidala kini sa crime laboratory alang sa eksaminasyon.

Igo nalang sa pagpatulo sa iyang luha ang magtutudlo samtang gidala uban sa iyang kauban sa police station. (JKDP)