MATAG-OB, Leyte - Wa pay nakitang motibo ang kapulisan ning lungsod sa pagpusil patay sa usa ka maestro sa wa mailhing gunman sa Barangay Mansalip ning lungsod pasado alas 6 sa gabii, Biyernes, Nobiyembre 1, 2019.

Ang kapulisan niila sa biktima nga si Michael Vincent Olorvida, 32, minyo, public school teacher ug usa usab ka wedding photographer.

Base sa imbestigasyon, sakay sa iyang Nissan Navarra pick up truck si Olorvida kauban sa iyang asawa nga si Emma ug duha ka anak nga sila si Vince, 10 ug Shantille, 2 anyos.

Sa dihang padung na mo-maneuver sa iyang sakyanan gikan sa parking area aron unta mobiya kay padung sila motambong sa panagtigom sa pamilya, kalit nga niabot ang gunman sa kilid sa driver seat ug gipusil si Olorvida tumong sa ulo.

Namatay dihadiha si Olorvida samtang dali nga midagan ang nag-inusarang gunman padung sa bukirang bahin sa Sitio Ligpong, Barangay Mansalip.

Narekober sa kapulisan gikan sa crime scene ang usa ka magazine sa kalibre .45 nga dunay unom ka mga bala. Ila pang sutaon og maayo ang background ni Olorvida kay sa pasiunang pakisusi, di pa madeterminar unsay motibo sa pagpatay sa magtutudlo. (JKDP)