UNOM ngadto sa walo ka oras nga way kuryente ang masinati sa pipila ka mga konsumidor sa Visayan Electric Company (VECO) karong weekend, Marso 16 ug 17, subay sa pagbalhin/pag-ilis sa mga poste ug pag-upgrade sa mga transformers.

Gisugdan sa Veco ang scheduled power outage niadtong Huwebes, Marso 14, diin molungtad hangtod sunod semana.

Unang mawagtangan og kuryente ang pipila ka mga konsumidor sa Sawang Calero, Suba, Pasil, San Nicolas & Duljo Fatima, Cebu City sugod alas 12 sa kaadlawon hangtod alas 6 sa buntag sa Marso 16, Sabado.

Ilisan ang hotspot disconnect switch sa maong mga lugar.

Samtang alas 8 sa buntag sa samang adlaw, magsugod usab ang walo ka oras nga wala’y kuryente sa Zapatera sa may Mango Ave., lakip ang Southland Maclin Int’l.

Alas 9 sa buntag magsugod usab ang walo ka oras nga scheduled power interruption sa pipila ka parte sa mga barangays Sambag II, Sambag I, Lahug, Guadalupe, ug Talamban sa Cebu City, Casuntingan, Banilad ug Cabancalan sa Mandaue City.

Samtang sa Dominggo, Marso 17, sugod alas 8 sa buntag, way kuryente sa pipila ka parte sa Barangay Camputhaw sa dakbayan sa Sugbo.

Lakip na ang barangays Cantao-an, Cogon ug Inayagan sa dakbayan sa Naga ug Guindarohan sa Minglanilla.

Laing duha ngadto sa walo ka oras usab ang mahitabo sa Martes ug Miyerkules.

Sa Martes, Marso 19, way kuryente sa Pangdan sa dakbayan sa Naga tungod kay aduna’y himuon nga trimming sa kahoy sa dapit sugod alas 10 sa buntag. (HBL)