MGA nagpasiugda ug nisalmot og drag racing diha sa Cebu South Coastal Road (CSCR) sa habig sa Talisay City, pangdakpon.

Kini ang bahad ni Talisay City Police Station chief, Police Major Gerard Ace Pelare human siya nakadawat og report sa miaging semana, katapusang bahin sa Oktubre, kalabot sa mga nihimo’g palumba sa mga motorsiklo sa coastal road.

Matod ni Pelare, nga gawas nga kuyaw ang palumba, ilegal kini kay way permit.

Ang lugar di angay himuan og drag race kay posibleng makadisgrasya sa ubang mga sakyanan ug motorista.

Lakip sa kalapasan niini ang pustaanay, diin mamahimo sila nga masikop pinasikad sa Presidential Decree (PD) 1602, kun illegal gambling.

Kalapasan usab ang kasaba sa ilang mga motorsiklo nga mamugna tungod sa palumba, kun alarm and scandal.

“We are appealing and warning them to stop that drag race in SRP. Aside from dangerous, you are already violating a lot of laws,” pahinumdom ni Pelare.

Matod niya, gihatagan lang una nila og kahigayunan ang mga nalambigit sa drag racing nga di mohimo pa sa ingon diha sa SRP sa miaging buwan.

Apan ning Nobiyembre, mohimo na sila og operasyon.

Kasagarang himuon ang palumba sa motorsiklo sa CSCR pasado alas 12 sa tungang gabii hangtud na sa alas 3 o alas 4 sa kaadlawon. (B)