KON masakpan nga nag-sex sud sa sinehan, mahimong mabilanggo og unom ngadto sa 12 ka tuig, matod sa Regulatory and Complaint Board (RCB).

Bisan kon ang sex sa sud gidili, giklaro ni RCB chairperson manlalaban Edgardo Uy nga wa nila did-i ang magtiayon o manag-uyab sa pagtan-aw og sine sud ning mao nga mga establisemento.

“Just make sure you are really watching a movie,” matod ni Uy.

Siya niingon nga ang manan-away, bisan kon naa sila sa legal nga edad apan nagbuhat og law-ay sa pampublikong lugar sama sa sinehan, duna tulubagon sa Article 201 sa Revised Penal Code.

Nagdili kini sa immoral nga mga buhat, mga law-ay nga mga mantala ug exhibitions ug bastos nga mga pasundayag s sinehan.

Mga makalapas mahimong mag-atubang og silot nga “prision mayor” o multa nga P6,000 ngadto sa P12,000.

Matod ni Uy nga ang RCB di anti-business. Kon ang balay patigayon motuman, ang RCB motabang pa pag-promote niini nga child friendly.

“Dili man gyud totally bawal ang mag-uyab, ang atoa is bantayan lang nga nagtan-aw ra gyud og sine, dili lain ang tuyo. Kon lain ang tuyo, didto nalang sa lugar na para anang mga butanga,” siya nidugang. (PJ Orias sa Sunstar Philippines)