MAGSUGOD na og panakop ang Cebu City Police Office sunod semana sa mga tambay nga nakalapas sa mga kasamtangan nga ordinansa ug balaod subay niining Oplan Tambay sa kapulisan.

Niabot usab sa 453 ka mga tawo ang nasita sa kapulisan atol sa Oplan Tambay niini niadtong Biyernes sa gabii hangtod kagahapon sa kaadlawon, lukop lalawigan sa Sugbo.

Sa dakbayan sa Sugbo, niabot sa 305 ang gisita sa kapulisan diin naglakip kini sa 60 ka mga tawo nga nag-inom sa gidili nga lugar; 44 nanigarilyo sa pampubliko nga lugar; 73 wala’y sinina; 6 sa anti-dispatching; 64 ang menor nga nilapas sa curfew ordinance; 6 sa anti-noise; 7 ang pataka og pangihi, pangluwa, paglabay; samtang ang laing 34 nalakip sa nangita og gubot o gang wars, ug uban pa.

Matod ni CCPO Director Joel Doria nga nagmalampuson sila sa unang tulo ka adlaw sa pagpatuman sa Oplan Tambay diin ang gihimo nila mao lang ang pagpatuman sa kasamtangan nga mga ordinansa sa dakbayan ug balaod sa nasod.

“Ito yung sagot sa mga complaints, we have to implement, for the safety nang ating kababayan dito sa Cebu City,” si Doria nga nahinabi sa Sun.Star Cebu.

Dugang niini nga ang gihimo karon sa kapulisan di kini lakang isip pagpangandam sa martial law.

“Hindi naman kasi may basis tayo and (what) we are doing now is implementing what is already in place na mga batas at city ordinances,” pasabot ni Doria.

Gibutyag niini nga giandam na nila ang bag-o nga prisohan sulod sa CCPO diin prisohon ang mga madakpan sa Oplan Tambay nga nilapas sa ordinansa ug balaod.

Apan kon ang madakpan nalambigit na sa kriminal nga kaso hilabi na og drugas, sa presinto na kini prisohon.

Nipadala na usab sila og suwat ngadto sa Commission on Human Rights (CHR) aron imbitahan kini nga mokuyog sa ilang operasyon aron masiguro nga way malapas nga katungod sa katawhan.

Samtang nakatala ang Cebu Provincial Police Office og 148 ka mga tawo nga nasita lukop lalawigan sa Sugbo atol sa ilahang Oplan Tambay.

Naglakip kini sa 30 ka mga nag-inom sa gidili nga lugar; 22 sa smoking ban; 32 ang wala’y sinina; 62 ang menor nga nilapas sa curfew ordinance samtang laing 2 nga nakalapas sa kasamtangan nga ordinansa sa lungsod o dakbayan.