GIHULAGWAY nga “magician” sa kuwarta tungod sa kapaspas niining mangkupit, gipasakaan na og mga kasong pagpangilad ug paghupot og illegal drugs sa Huwebes sa buntag sa kapulisan sa lungsod sa Minglanilla, habagatang Sugbo.

Giila ni Police Staff Sgt. Ernest Laspoña sa Minglanilla Police Station nga nahinabi sa Superbalita Cebu ang suspek nga si Archer Panga-an, 48, taga Cagayan de Oro City.

Mga kasong swindling/estafa, ingon man kalapasan sa Section 11 sa Comprehensive Dangerous Drugs Act of 2002 kun Republic Act (RA) 9165 nga possession of illegal drugs.

Wala makagawas si Panga-an gumikan kay non-bailable ang kasong illegal drugas nga iyang giatubang.

Nakuhaan siyag 6.9 grams nga shabu balor og P40,800.

Samtang at-large ang kauban niini nga si Reynante Estrada.

Si Laspoña nihulagway kang Panga-an nga usa sa mga banggiitan nga sakop sa budol-budol.

“ Magic-magic ni iyaha. Abtik og kamot. Ilisan niya ang kwarta nga gipasinsiyo. Sige man insister nga kuwang ang nabantayan sa cashier nga giilisan, nanawag og police, nadakpan” dugang ni Laspoña.

Magdala siya og kwarta nga tag P100 nga binandol ug kunohay ipatibuok og tag P1,000, apan iuli niyag balik kay nausab ang iyang huna-huna.

Diay, gikupitan na niya ang kwarta, apan aron di makabantay ang biktima nga gikupitan na, iyang ibalik ang gipailisan nga tag P100 apan sa gamay na lang nga kantidad ang ipatibuok.

Ang grupo niini gisubay pa sa ilang mga imbestigador.

Ang ilang nakuha nga impormasyon nga diha ni nidangop sa mga kaila sa taytayan ilawom sa Mananga, Tabunok, Dakbayan sa Talisay./GPL